Gal 1 | DOB | STEP | 'Abo'agu Yesu Keliso 'ina tosimana 'ebweu, ta 'igu etosimana nigeya tomota 'idi esinuwega, ta Yesu 'ina esinuwega, be Tamada Yaubada wate. Tauna Yesu mwawasega 'igietoolo limena.

Galatians 1

Lokagutoki

1 'Abo'agu Yesu Keliso 'ina tosimana 'ebweu, ta 'igu etosimana nigeya tomota 'idi esinuwega, ta Yesu 'ina esinuwega, be Tamada Yaubada wate. Tauna Yesu mwawasega 'igietoolo limena. 2 Ta yaudi tasidao nidi ma'egwao bada 'amiyami 'imi leta 'aetunenawa 'omi totapwalolo, boda 'ebweuna 'ebweuna sena Galetia solanaya, 'emiya.

3 Tamada Yaubada be 'ida 'Inapwana Yesu Keliso 'idi obobomega wada miya bobo'ana. 4 Manuna Tamada Yaubada 'ina nuwanuwa gete nadigega, ga Yesu tauna 'itagwalena ga 'imwawasa 'ida loegesiyao manudi, be 'enega tuta gete to'umalina 'ina waiwaiyega 'i'etoseyeda, 5 Gete manuna Yaubada 'ena tada tupu atae. Eimeni.

Tetela bobo'ana 'ebweuna namo

6 'Ebe nuwaowana gete 'eguya, manuna lowa Yaubada 'iesinuwemi be 'aene oboboma Keliso 'enega waloba, 'enega tetelina waemisena, ta walomanini gete tuga ga waguitoyasena, ta mali tetela waemisena. 7 Ona'ai'aila, Tetela Bobo'ana 'ebweuna namo, ta nigeya 'ebweu wate tetela 'imiyami, ta esi 'aina tomota ni'atu sigiekwanimi, manuna nuwanuwadi be Keliso tetelina sisa'u gelase be 'enega sikaboemi. 8 Keliso tetelina wagimi nonona nate 'ai'ailina, 'enega geya'abo 'ebweu yaita sa'i mali tetela 'ida 'ebwa'ebwa'emi. 'Abo'ama wate be aniloseyao galewega geya'abo mali tetela 'a'ebwa'ebwa'emi. Ta 'eguma yaita tetela bobo'ana 'isa'u gelasena be 'igiedumedumena, mwau 'ida loba Yaubada 'enega. 9 Ni'atu lowa 'asimana 'emiya, be gete wate yasimana limana 'aene 'eguma yaita mali tetela 'i'ebwa'emi, 'elouya 'ida loba Yaubada 'enega.

10 Mwa'adega, tomota nidi 'adi tuputupu manuna yanuwanuwa, nai Yaubada 'ana tuputupu? Manuna 'eguma tomota 'idi nuwanuwa yaguiguinuwa, nigeya sawesaweguya be Keliso manuna yaetoguinuwa.

Paulo 'ina nuwa'ebuni

11 Gosegwao, wada nuwa'i'isi 'aene tetela bobo'ana yasimanenawa, nigeya tomota 'ediyega, 12 manuna nigeya tomota 'idi simanao nai 'idi e'itao 'ediyega, ta esi Yesu Keliso 'ina e'ita 'eguya 'enega. 13 Ta 'igu bubuna lowa, tuta nina me Yudia 'idi boda solanaya yamiyami, wanonona, 'aene Yaubada 'ina toekalesiyao yagie'elouya wawasaedi ta nuwanuwagu be yamutudi. 14 'Enega 'agu 'epatao Yudia solanaya yaewaiwai sinedi, manuna tubudao 'idi bubuna manuna yaetapewa sinabwana ta 'agu 'epatao 'idi etapewa tupwana namo.

15 Tuta nina nigeya yatubutubuwa, ta lowaenei Yaubada 'ina obobomega 'igimi esinuwegu, 16 ta tauna 'ina nuwenuwega Natuna 'eguya 'ie'itaena, be yada etosimana manuna, sena apwesa 'ediya. 'Enega nigeya yatautauya tomota 'ediya sabi enaida tetela gete manuna. 17 Nigeya yatautauya Yelusalema Keliso 'ana gimi tosimanao 'ediya, ta esi yatauya Alebia, ga nada yamiyami 'ana laba yaila limana Damasiko 'enaya.

18 'Enega yakwala 'etoi mulinaya yalaga Yelusalema ga Pita yayausina, ta nada ma'iyagu 'asiyata pipitini 'amiyami. 19 Ta Keliso 'ana tosimanao yaudi nigeya yada 'itedi. Nate namo Yemesa, tauna 'ida 'Inapwana nina tasina. 20 'Igu ona gete Tamada matanaya ya'etoladinawa nigeya 'ebweu wate kabo.

21 'Enega Yelusalema yapilisinena ga yatauya Silia be Silisia 'idi senao 'ediya. 22 Ta tuta nidi 'ediya Keliso 'ina toekalesiyao Yudia senanao 'ediya maninigu nigeya sida mwalatonina. 23 Nate namo teteligu sinonona 'aene “Tauna lowa 'igiegie 'elouyeda, ta ni'atu 'inuwa'ebuni, ga tetela nina lowa 'i'eto'etobodena tuta gete 'iloguloguguyae.” 24 'Enega toekalesiyao nidi Yaubada situpuna 'igu nuwa'ebuni manuna.